पाऊस
पाऊस आठवांचा, पाऊस साठवांचा
गर्भारल्या रानी, निथळल्या पालवांचा
गर्भारल्या रानी, निथळल्या पालवांचा
पाऊस गर्द हिरवा, पाऊस जर्द शिरवा
मेघाळल्या गगनी, रंगलेला गारवा
मेघाळल्या गगनी, रंगलेला गारवा
पाऊस याद ऐशी, पाऊस साद तैशी
ओलेत्या मनी ही, ओलेती भूल कैशी
ओलेत्या मनी ही, ओलेती भूल कैशी
पाऊस चिंब गाणे, पाऊस ओले तराणे
भिजलेल्या ओळी, अन दाटलेले बहाणे
भिजलेल्या ओळी, अन दाटलेले बहाणे
पाऊस गंध माती, पाऊस छंद सोबती
दरवळत्या अंगणी, ओथंबलेली पाती
दरवळत्या अंगणी, ओथंबलेली पाती
पाऊस बोल बरवा, पाऊस अबोल हळवा
अंकुरल्या बीजाचा, सोसलेला रुजवा
अंकुरल्या बीजाचा, सोसलेला रुजवा
- नेहा लिमये
No comments:
Post a Comment